كول وشكور

موضوع: كول وشكور الأربعاء مارس 05, 2008 6:54 am

عماد موسى

يبدآن الجلسة اليومية بـ" إيييييه دِني ...رزق الله ...ولك شو بيعرّفني يا زلمي !" .أمس افتتحا القعدة في ركن مشمس واستعرضا طقس شباط وتداولا في أبرز التطورات على الساح المحلية والإقليمية. قزحيا الواسع الاطلاع افتتح الحديث وهو يلهو بعصاه.

· يا خيي هالأميركان . أش بيعرفني . وصلوا عالسكسكية بالغواصة كول
- ها؟

· كول يا أنيس.
- أكلت الساعة 6 كاسة مهلبيّة. بلا سكر المهلبيّة ما بتنبلعش.

· فيا سيدي عم يحكوا إنو كول ...
-... كول وشكور تقيلة. يلعن بيّ بي السكري. والنفس دنيّة بتطلب

· ...وبتحمل ستّعش سبعتعشر طيارة أف تمنتعش
- هوهووو وقت كنت بالتمنتعش يا قزحيا كنت بلا مواخذة إتحلّى بصدر كول وشكور بعد الغدا

· متل ما عم تقول صواريخ بعيدة المدى
- المرحومة هدى بعد ما تجوزنا، وقبل ما الله يطعمنا عبدالله كانت تقول لي أنا وعم حضّر الغداء: يا ريت بتفل عالمريخ وبتريحني من ريحة الطبيخ .

· صواريخ ألله ينجينا ، كل صاروخ بلا معنى طوله 100 متر
- قولتك رح نعيش للميّة ؟ أش بيعرفني دِني !فبالزمانات كنت حضّر الـ كول وشكور بالبيت

· بيخبروك عن الرادارات بتلقط من عرض البحر على بقعتوتة. ربّك بيعرف كيف
- أنا بقلّك كيف؟ بدك تفرك العجينة بالسمنة وتقطّعها مربعات زغيرة

· ما عم تقطع الخبرية براسي يا أنيس طول كول من السكسكية للمعاملتين؟
- وبعدين؟ ما روق عليي واصلّك بالحديث. بدك تحشي العجينة صنوبر مبروش وترش ماء الزهر مع فستق حلبي مطحون

· قولتك بيضربوا كأنيس؟
- نص ساعة بالفرن ووقت تشوفها هيك لوّحت بتحط فوقها القطر

· أكيد معهم حبل قطر، إذا انضربت الصبابات ودخّن الموتور بيطفوها وبيقطروها عل قطر
- أنا كنت إستعمل سمن حموي للكول وشكور، هلّق كلّه بلا طعمة. الناس تغيّروا والحياة كلّها ما عاد إلها طعمة. مبارح اشتريت كيلو فول ...

· ما عم خبرك كأنيس ،يا بارك الله بتحمل كول لواء كامل
- نشكر ألله ونحمده كل ساعة يا قزحيا

· سمعت على إذاعة ال أل بي سي إنو حزب ألله ما رح يسكت على تحركات أميركا البحرية.
- اسم الله جابت كنتك بنت ؟ وقدّي عبدالله مبسوط ؟ يالله انشالله يشوفوا إيام خير. دخلك يا قزحيا سمعت شي عن الفرقاطة الأميركية كول؟
- أنا قبل الـ11 ما بحط شي بتمي. إنت كول شي كعكة حاسّك صحتك متعلسة وصاير سمعك خفيف!